AS Kii Ugu Badnaa Oo Xalay Lagu Laayay Duqayn Iyo Dalalka Ay U Dhasheen Saraakil Ajaanib Ay Oo Laayay

Faah-faahino dheeraad ah ayaa waxaa laga helayaa khasaaraha ka dhashay duqeyn xoogan oo xalay ka dhacday degmada Kunya-barow ee gobolka Shabeelaha Hoose, taas oo lala beegsaday goob ay ku shirayeen saraakiil sar sare oo ka tirsan kooxda AS.

Duqeynta oo bartilmaameed ahayd ayaa u dhacday sidii loo qorsheeyay, sida ay shaaciyeen saraakiil ka tirsan ciidanka Xoogga dalka Soomaaliyeed ee howlgallada ka wada gobolkaasi.

Afar gantaal oo culus ayaa la sheegay inay ku dhaceen gudaha magaalada, kuwaas oo qaarkood lala helay xarunta ay ku shirayeen saraakiisha AS , halka kuwa kalena lagu burburiyay gaadiid ay lahayd kooxda.

Wararka ayaa intaasi ku daraya in saraakiishii ugu badnayd iyo dagaalamayaal gaaraya illaa 70 xubnood lagu laayay duqeyntaasi, kuwaas oo ay ku jiraan saraakiil ajaaniib ah.

Waddamada illaa iyo hadda la shaaciyay saraakiisha ajnabiga ah ee la dilay waxay kasoo kala jeedaan dalalka Kenya, Suudaan, Yemen iyo waddamo kale.

Sidoo kale saraakiil kale oo Soomaali ah ayaa lagu khaarijiyay duqeynta, kuwaas oo fadhiyay shirka, xilliga la duqeynayay degmada Kunya-barow ee gobolka Shabeelaha Hoose.

Dowladda Soomaaliya ayaa sidoo kale la filayaa in saacadaha soo socda ay faahfaahin rasmi ah ka bixiso duqeyntaasi lasoo wariyay in xubno badan iyo saraakiil looga dilay AS

Dhanka kale ma jiro illaa iyo hadda wax war ah oo kasoo baxay dhinaca kooxda