Gaza waxay ahayd goob dagaal ku dhawaad laba sano. In ka badan laba milyan oo ka mid ah dadka deegaanka ayaa gaajo la ildaran, waxaana gubaya holaca dagaalka.
Inta badan Qaza waxaa burburiyay duulaanka dhulka, badda iyo cirka ee Israel. Dadka deegaanka ayaa ku nool burbur iyo teendho, wuxuuna Trump sameeyay soo jeedin lama filaan ah oo cusub bishii Febraayo ee la soo dhaafay.
Arintan ayaa noqotay mid si weyn loo hadal hayo kadib markii uu madaxwaynuhu si cad ugu dhawaaqay in dalkiisa Maraykanka uu la wareegayo gacan ku haynta Qaza oo uu dib u dhisi doono deegaan aad u qurux badan iyo goob madadaalo ah si loo soo afjaro dagaalka Gaza.
Waxaa la sheegay in inta lagu guda jiro hawshan, dadka deggan Qaza ee dagaaladu aafeeyeen lagu khasbi doono inay ka baxaan aaggaas oo ay dib u dejiyaan waddan kale, iyagoo aan xaq u lahayn inay dib ugu noqdaan.
Waxaa jiray diidmo ah in tani ay Gaza ka saarayso maamulka Falastiiniyiinta oo ay muwaadiniinteeda u rogi doonto qaxooti.
Todobaad ka hor, mareegta Mareykanka ee Axios ayaa sheegtay in Israa’iil ay wadahadallo la leedahay labo waddan oo ay ku jirto Itoobiya, kuwaas oo ku saabsan suurtagalnimada in la dejiyo Falastiiniyiinta.
Dhinaca kale, David Barney, oo ah madaxa hay’adda sirdoonka Israel ee Mossad, ayaa wadahadal uu kula yeeshay Washington ergayga Bariga Dhexe ee Trump, Steve Witkoff, uu ku sheegay inay kala hadlayaan saddex waddan si loo dejiyo Falastiiniyiinta, wuxuuna ka codsaday taageerada Maraykanka.
Laba il oo arrintan la socda ayaa Axios u sheegay in madaxa Mossad uu sheegay in Israa’iil ay si gaar ah ula xiriirtay Itoobiya, Indonesia iyo Liibiya, isla markaana ay dalalku diyaar u yihiin inay aqbalaan Falastiiniyiinta ka baxaya Gaza.
Intii uu socday kulan dhex maray saraakiil sarsare oo Maraykan ah iyo Israa’iil, Barney ayaa la sheegay in uu Maraykanka ka codsaday in uu dhiirigeliyo dalkiisa oo uu gacan ka geysto sidii Israa’iil looga dhaadhicin lahaa arrintan.
Hase yeeshee ma jiro wax war ah oo ka soo baxay saddexdan dal ee lagu sheegay warbixintan, isku dayo ay BBC-du ku doonaysay inay ku hesho wasaaradda arrimaha dibadda Itoobiya ayaanay wax jawaab ah ka bixin.
Warkaas ka dib senetarka Maraykanka Chris Van Hollen ayaa ka horyimid codsigii Israa’iil ee taageerada Maraykanka ee ahaa in Falastiiniyiinta laga daadgureeyo Qaza oo dib u dejin loogu sameeyo waddan kale.
Senator Van Hollen oo daba socday wararka sheegaya in madaxa hay’adda sirdoonka Israa’iil iyo ergayga gaarka ah ee Trump ay kulmeen si ay arrintan uga wada hadlaan, ayaa maqaal uu ku qoray boggiisa X waxa uu ku sheegay in qorshahan uu yahay mid isir sifayn ah.
“Maraykanku waa in aanu ku lug yeelan xasuuqa isir sifaynta ah ee lagu hayo dadka reer Qaza iyaga oo isticmaalaya lacagta dawladda iyo cashuur bixiyayaasha, uma dulqaadan karno arrintan” ayay ku mudaharaadeen.
Horumarinta kanaalkan oo uu Maraykanku kormeerayo, kaas oo dib u dejin u samayn doona dadka deggan Gaza, oo hadda la ildaran gaajo oo ay ku dhimanayaan weerarrada, ayaa diidmo xooggan kala kulmay dawlado iyo hay’ado kala duwan.
Inkastoo Madaxweyne Trump iyo Ra’iisul Wasaaraha Israa’iil ay si weyn u daneynayaan fulinta qorshahan, haddana waxa aan weli la go’aamin ayaa ah halka loo rarayo Falastiiniyiinta
